"من غير نوم .."

عايزه اقطع علاقتي بالواقع!

فيها ايه يعني لما اقطع علاقتي بيه ؟

مفيش خناق ولا دوشه..

مفيش صداع ولا ناس..

مفيش اكتئاب و خيبة امل..

مفيش صراعات و سياسه..

مفيش .. مفيش اي حاجه .. 

و مفيش كل حاجه.

فيها ايه يعني اعيش في العدم؟ .. 

هدوء. ضلمه. فراغ..

هيبقي حلو, راحه .. سعادة..

معرفش عايزه اهرب من الواقع.

                                                           "من غير نوم .."

هي (:

شكر خاص ل..

 اللي بتفوقني من الغيبوبه

 و بتشدني كل ما اهرب من نفسي

 و اللي بتسمعني لما بجيب اخري

 و اللي بتطلعني من وجعي لما اتعب

واللي بتقومني لما اقف 

و اللي بتلحقني لما اغلط 

و اللي بتساعدني كل مره 

واللب بتقف في صفي حتي لو انا غلطانه " و تحاسبني بعدين.."

واللي بتدافع عني لو حد قال نص كلمه 

اللي مستحملاني بقالها سنين 

و اللي بتسامحني مهما بغلط

اللي اخرها تضايق مني ساعتين

واللي بتستحملني وانا بلطش فيها

و اللي لما اقولها مش طايقاكي تاخدني بالحضن

واللي اما بقولها وحشتيني تقوللي مانا بوزي في بوزك طول اليوم

واللي لما بتسافر واسيبني بنعزل و اقعد في بيتنا استناها

و اللي لما تختفي بتخض عليه

واللي اما بشتمها بتقعد تضحك و تقوللي يا هبله 

اللي نقعد انا وهي نقول هنذاكر و في الاخر تلاقينا خلصنا الوقت عالكلام

و اللي اول ما نقول عايزين نخرج اهم حاجه في الخروجه الاكل

اللي صحابنا حتي مش هما هما و احنا برضه مع بعض ..

اللي بحبها و هفضل احبها حتي لو مفضلناش زي دلوقتي :) 

مستني ...

مستني رد عارف انك مش هتسمعه ..

مستني حد عارف انه مش راجع ..

مستني اجابة سؤال عارف ان ملهوش رد ..

مستني حاجات كتير اوي , انت متأكد ان في كتير منها مش جاي و عايش علي امل ان الفاضلين ييجوا ..

قاعد مستني, في حاجات بتحاول توصلها ..

و الباقي مبقاش بايدك, انت عملت اللي عليك و غيرك عليه يكمل ..

منهم هيكمل و الباقي متأكد ان خلاص مفيش امل يرجعوا يكملوا ...

يمكن في حاجات من اللي انت متأكد انها مش هتكمل دي;

من كتر مانت نفسك فيها بتدور علي بديل للشخصاللي مش راجع يكمل ده ..

و اديك برضه مستني ..

نقطه و من اول السطر

اليوم شغال, عقارب الساعه بتلف, الناس بتتحرك, التليفونات بترن .. كل حاجه طبيعيه.

حتي احنا بالابتسامه الساذجه اللي تقريبا ملهاش ولا معني ولا لزمه بس اهو تغيير ..

خلصت اللي وراك يوم وقعدت تفكر " دلوقتي هيحصل ايه؟" 

حاسس ان كل حاجه بتحصل في حياتك هي جمل و كلهم مابينهم فاصله..

مفيش تجديد , مفيش تغيير .. كل حاجه زي ما هي ..

كل اللي انت محتاجه "نقطه و من أول السطر" (:

طول ما ربنا موجود ..

طب ما دام ربنا موجود .. بندور على البشر ليه؟ ما دام خالقك و مستنيك و طول الوقت بابه مفتوحلك يسمعك و يديك اللى انت عاوزه بشرط انك تفضل فاكره و تسمع كلامه .. بترخص نفسك و تروح لواحد زيك مش هيعملك حاجه غير انه يسمع من ناحيه و يطلع من التانيه ليه ؟ بتعذب نفسك ليه ؟ طول ما عندك رب ماترحلوش ليه؟ عصيته ؟ خايف منه ؟ ربك كبير زز ده اسمه الرحمن الرحيم !!! يبقى خايف ما يسامحكش ؟؟ ده انت تبقى معندكش مخ يوم ما تفكر انه بيكرهك ولا مش هيسأل فيك .. ده هو اللى خالقك .. يبقى بيكرهك ؟ د انت لما بترسم حاجه و تعجبك بتحبها يبقى هو اللى تعب فيك و خلقك أعظم مخلوقات الكون .. تفتكره بيكرهك ؟؟  

ربنا لما بياخد حاجه بيدى حاجه .. خليك فاكر ربنا مبينساش ..  

طب اقولك ... ادى اسماء الله الحسنى اقراهم .. براحه .. اقرأ اسم اسم و شوف معناه 

و الله هتعرف اد ايه انت ملكش غيره فى الدنيا و فى الأخره

الله | الرحمن | الرحيم | الملك | القدوس | السلام | المؤمن | المهيمن | العزيز | الجبار | المتكبر | الخالق | البارئ | المصور | الغفار | القهار | الوهاب | الرزاق | الفتاح | العليم | القابض | الباسط | الخافض | الرافع | المعز | المذل | السميع | البصير | الحكم | العدل | اللطيف | الخبير | الحليم | العظيم | الغفور | الشكور | العلي | الكبير | الحفيظ | المقيت | الحسيب | الجليل | الكريم | الرقيب | المجيب | الواسع | الحكيم | الودود | المجيد | الباعث | الشهيد | الحق | الوكيل | القوي | المتين | الولي | الحميد | المحصي | المبدئ | المعيد ا المحيي | المميت | الحي | القيوم | الواجد | الماجد | الواحد | الأحد | الصمد | القادر | المقتدر | المقدم | المؤخر | الأول | الآخر | الظاهر | الباطن | الوالي | المتعالي | البر | التواب | المنتقم | العفو | الرءوف | مالك الملك | ذو الجلال والإكرام | المقسط | الجامع |الغني | المغني | المانع | الضار | النافع | النور | الهادي | البديع | الباقي | الوارث | الرشيد | الصبور

عمرك فكرت ليه ربنا ممكن يكون ابتلاك بحاجه ؟ فكرت ان دة ممكن يكون امتحان عشان يشوف انت بتحبه ولا لأ ؟ مفكرتش انه بيعلمك درس؟ مفكرتش انه بس نفسه يسمعك بتنادى باسمه بتقول "محتاجلك يا رب مليش غيرك" ؟ 

مفكرتش ان الدنيا كل حاجه فيها فانيه الا ربنا سبحانه و تعالى ؟

هو اللى هيفضلك .. و انت ميت فى قبرك محدش هينفعك بس هاتقول " يا ريتنى سمعت كلام ربنا " 

هتلاقى نفسك بتحاسب نفسك على كل غلطه غلطها فى حق ربك !!

هتلاقى نفسك بتقول "ليه:" 

"ليه مسمعتش كلامه ؟" 

"ليه عصيته؟"

..

انت غلطت ؟ ما كلنا بنغلط !!!

غلطتك كبيره ؟ فى ناس غلطهم اكبر منك !!

بس انت متنساش " ان الله غفور رحيم " !!

..

انا غلطت و باغلط و هاغلط .. و مش انا لوحدى ده كلنا ..

بس بدل مل تقول انا مكسوف منه .. قول انا محتاجله ..

قول هاروحله .. استأذنه .. أطلب منه السماح .. هيسامحك لو انت ندمان بجد ..

عشان هو الوحيد اللى حاسس بيك ..هو الوحيد اللى عارف ان انت ندمان مر الندم .. و موجوع بسب الندم ده عشان انت عارف انك غلطان !!! 

طب مانتا لو مش حاسس انك غلطان مكنتش اتضايقت ولا حسيت بالذنب ولا رحت اترجيته يسامحك عشان خايف على زعله !!

طب مانتا بتحبو اهو و خايف منه و نفسك تراضيه ..

______ 

أصل انا ياما غلطت .. و مسمعتش كلامه و خالفت أمره .. شوفنى دلوقتى .. هاموت بس عشان أعرف بعد الألم و العذاب بتاع احساس الذنب ده هو سامحنى ولا لأ .. ساعة مل بصلى و بركعله بعيط عايزاه يسامحنى .. و خايفه أموت قبل ما يسامحنى .. أصل مش هينفعنى غيره ..

"يا رب , سامحنى  .. " 

.. 

كل الكلام اللى انا كتبته ده وجعنى أكتر مع انى اتبسطت انى طلعت الوجع .. بس لسه احساس ذنب الغلط موجود .. و لسه الخوف من انه مايكونش سامحنى موجود .. 

يا رب اسلمت أمرى اليك .. فارحمنى يا أرحم الراحمين ...

 ___________________________________________________________________________________

12/7/2012 

هم..

بسمع صوته و هو بيسألني

و بسمع صوتها و هي بتزعقلي

و التانيه بفتكرها اما كانت بتعيطلي..


و هو لما قرر يقول مش قادر

والتاني كمان لما جه قاللي مينفعش..





فاكره شكل كل واحدفيهم بالتفصيل, فاكره نبرة الصوت


فاكره غضبهم اللي فوقني ..

و بعدهم اللي كاسرني ..

فاكره شكل كل واحدفيهم بالتفصيل, فاكره نبرة الصوت


فاكره غضبهم اللي فوقني ..

و بعدهم اللي كاسرني ..





فاكره الغلطه اللي بعدتهم عني بس مش قادره ارجع بالزمن و اغيرها..

كل اللي قدرت اعمله اقول "انا اسفه"

بس الأسف معادش يأثر .. عشان هما جابو اخرهم ..





و انا اتغيرت و هما اتغيروا ..

واحد بس برضه المكان موجود.. يمكن انا بقيت في حته و هما في حته ..

بس لسه ليهم مكان عندي .. لأن كل واحد فيهم ساب علامه في حياتي و ساب علامه في قلبي ..

مشيوا ؟ اه .. لكن اثارهم متمحتش ..

كل حاجه هتبقي تمام.

قريب بعدت عن واحده بعتبرها اقرب واحده ليا

. اكتشفت بعدها حاجات كتير اوي غلط كنت بعملها و هي استحملتها

. بس الأسوأ ان انا بطلت اروح المدرسه و الدرس اللي هي معايا فيه. و بروح الكشافه بالعافيه.

 لسبب واحد : " مش قادره اقعد في نفس المكان معاها و انا عارفه ان دلوقتي مليش الحق اكلمها ولا اسلم عليه. و مينفعش اسألها مالك عشان مليش اتدخل" 

الوضع مضايقني ؟ ايوه جدا بس انا عارفه اني غلطت في حقها ..

بس مش حاسه ان البعد كان هو رد الفعل الصح

 .. مكنش ده اللي المفروض يحصل

لكل حاجه حل وسط و ده اكيد مش هو

بس حاليا ما باليد حيله .. لأن انا عارفه اني مش هتكلم

و حاسه اني ان لو اتكلمت مش هتفرق 

عشان خلاص اللي حصل حصل

هي كده احسن ...

و انا لوحدي احسن.. 

يمكن انا مش ميسوطه كده .. بس يمكن هي مبسوطه.

و بعدين هتعود. مانا خسرت كتير قبل كده.....

نظريه ..

ضيعت نفسك؟

خسرت صحابك و تعبت اهلك؟

فشلتفي التعليم و في حياتك؟ .. برافو ..

انت كده وصلت للقب (فاشل).

قاعد زيك زي اللي قاعد عليه.

و يمكن ملكش لزمه اكتر منه اصل هو علي الاقل له فايده.

عايش؟

بتصحي وتنام و تاكل و تشرب و تفتح نت و تكرر كل الحاجات دي تاني؟

يبقي متقولش عايش. قول شبه ميت

اللي عايش ده اللي له لزمه, له فايده, له ناس, له أهل, له صحاب و له نفسه..

بس انت معنكش دول ..  يبقي خلاص ميت!!

بتعمل حاجه غلط؟ قصدي حاجات خلص؟  أو بمعني اصح " كل حاجه غلط " ؟

مبتفكرش قبل ما تنفذ ولا قبل ما تتكلم ..
او بطلت تفكر و بطلت تتكلم؟

متضايق .. حاطط نفسك في يأس و فشل و اكتئاب؟    (صقفه كبيره)
مبسوط انت كده ؟
لأ؟ طب و سايب نفسك ليه ؟
بعت كل حاجه و استبيعت ليه؟
كبرت دماغك ليه؟

و متقولش اصل الظروف!
الظروف اصلا عمرها ما كانت مبرر مقبول!!

مينفعش تقول :-
مش هذاكر عشان المنهج غلط
مش هسمع عشان الكلام مش عاجبني
مش هتكلم عشان مش بتسمع
مش هعمل عشان مش فارق مع حد
مش بصحي عشان زهقت
وبنام عشان مش عايز اصحي
.. انت كده فضلك خطوه و تقول اصل انا بتنفس عشان مينفعش اقطع نفسي ..

فوق لنفسك, متسيبش نفسك تقع اكتر من كده
لو مش عشان غيرك يبقي عشان نفسك.. لو مش عشان نفسك يبقي حتي عشان اعلك اللي تعبوا عشانك..

حرام عليك نفسك.انت هتتحاسب علي اللي انت فيه في الاخر. متعملش كده, كفايه اذيه لنفسك "ولغيرك"

انت ذات نفسك قلت انك تعبت ..
طب ليه مكمل كده ما دام تعبت؟
و متاخدش ده مبرر للانتحار ده كده هبل

خده دافع عشان تفوق
عشان تقوم و تقف علي رجليك و متسيبش نفسك اكتر من كده !