هروب ..

ساعات كدة ، بتبقي محتاج حد.. 

حد يفهمك .. 

في اللي بيفهمك. 

بس ألمره دي بالذات مش فاهمك.. 

ولا هيقدر يفهم.. 

عشان أنت نفسك مش فاهم. 

نفسك حد يسمع و يفهم من غير ما تتكلم .. 

عايز تترمي في حضن حد و تعيط.. 

مع ذلك أنت عايش و بتتكلم و بتغني و بتخرج. 

لكن من جواك حاسس بألم.. 

ملوش وصف. 

ابتدي يتحول لألم فعلي .. 

وبرضة مش عارف تفكر.. 

تبعد و تسكت.. تغير عاداتك .. 

أكلك يقل ، نومك يكتر ، كلامك يهرب ، قرايتك تتعدم، كتابتك تتغير ، أفكارك تتجمد .. 

عايش بدون لزمه.. 

التغيير باين و كله حاسس.. 

يسألوك مالك ، مره تقول مش عارف 

و اللي بعدها تقول مفيش 

و بعدها كمان مرة الكلام ميطلعش.. 

 أصلك بقيت تستخسر في الناس الكلام .. 

خصوصا بقي و أنت بتكذب. 

ماهو أصلك بتقول مفيش و أنت حاسس هموم الدنيا في قلبك. 

و تضيق بيك الدنيا و ترجع لربك .. 

تحاول تتكلم ، كلامك يتحول دموع في سجدة .. 

-و آخرتها .. هتفضل قاعدلي كدة؟ بتضيع نفسك و مستقبلك و ناسك؟ 

 -طب وأنا أعملك إية؟

-قول حاجه. أديني نصيحة. أضربني حتي .. بس سايق عليك النبي ماتسيبني قاعد كدة.. 

- و أنا بئيدي إية؟ ما أنت حمار.. 

-ماشي يا سيدنا أنا حمار و بعدين؟ 

-ولا أبلين خليك بقي كدة و بأقولك إية ، سيبني أنام بقي. 

...

الحوار دة مش بيفكرك بحاجة؟ بنفسك كل يوم قبل ما تنام؟ 

طب بص بس هاقولك حاجه ، بوس أيدك وش و ضهر..

أنا عايشة في الحوار دة أربعة و عشرين ساعة و أنا صاحية و أنا بذاكر و أنا بمتحن .. حتي و أنا نايمة.. 

أسكت بقي وكمل زي ما أنت.. 

ولا أقولك روح انتحر .. 

ما هو دة كل اللي أنت فالح فية .. الهروب.