اعتذار متأخر.

بكرهك عشان خليتني عندي عقدة نقص و حسستني ان كل حاجه بعملها غلط .. 

كبتّني بكل الطرق حتي الصراخ مكانش مسموح.

منعت عني الناس اللي بحبها و الحاجات اللي بحبها عشان من وجهة نظرك غلط.

مشجعتنيش ف اي حاجه كنت بقول هعملها و كل غلطه لازم اخبيها عنك عشان متهزئش.

 اعصابي اتشدت و تعبت ..

 ممنوع اتضايق ولو اتضايقت مقولش.

 فاكر ان الانسان المفروض يبقي سعيد و بس. هقدر السعاده ازاي لو متاخدتش مني؟!

كان كل همك المستقبل و مبتفكرش ف النهارده .. ولا امبارح.

حاسبي نفسك .. مش ده كلامك؟ ..

 كرهتني ف نفسي .. احاسب واحده مبحبهاش و معدتش عايزاها؟

ليه كل ده ليه؟ .. خايف علي مصلحتي؟ .. 

كبت كبت .. و بعده .. انا انفجرت .. و اصبحت اسوأ من الاول.

الفكره ان انت خليتني يتطبق عليا جملة " الناس مبتتغيرش .. اقنعتها اللي بتقع " ..

انا اسفه ..  بس ده مش انا ولا عمري هكون.

بحكي عنك.

بحكي عنك .. كل يوم ..

بحكي ل كتبي وورقي و الالوان.
و بحكي للصفحات ..
بحكي للدوشه و للمزيكا و السكات و الوحده.
بحكي للملل و الرغي و الصداع.

بحكي عنك لكل حاجه بس ابدا ما احكي لحد ..

ياخدوك مني بعدين .. ولا يلوموني عليك.

بحكي لكل الحاجات و احكي بالليل و بالنهار ..
وياريتها تتغير العاده واحكيلك بدل ما احكي عنك ..

نمسي و نصبح ..

تصبحوا علي صوت حد بتحبوه
و اصبح انا علي صمت يقطع ف قلبي بقوة ساطور الجزار ف اللحم.

تصبحوا علي سعاده حب
و اصبح انا علي فراغ

تصبحوا علي خير
واصبح وانا علي اي سشئ و ان كان حزين.

تصبحوا زي ما تصبحوا ولا اصبحش انا ..

و هلأ شو..

شبابيك كنايس ملونه 

و عروق ايدين ناطره

لون مياة البحر ف عز الشتا 

عيون طفل بيضحك بعض عياط

مباني وسط البلد و محطة الرمل ساعة شروق او غروب

شكل دخان سيجاره و النفس طالع ببطء 

عروق ورده دبلانه مستخبيه بين صفحات كتاب

ضوافر بنت حلوه متلونه احمر او اسود 

سلسله قديمه شكلها بتحبه متعلقه ف الرقبه

خاتم دهبي محفور جواه حروف اسم

كراسه قديمه يُقرأ فيها افكار زمان 

زخارف جامع قديم بقاله سنين

ملح تحس بطعمه و انت ماشي عالكورنيش 

تليفون قديم عليه نمر ناس بقت ذكري 

شمعه والعه ف عز الضلمه مش شايف منها غير نورها

صندوق خشب قديم لقيته و احتفظت بيه 

كوباية قهوه ساده فاضل فيها حبة بن 

حاجات .. حنين .. مسببات سعاده..