نقطة البدايه.

اللي بيجمعنا شكل هندسي في سلسله..

و كام كلمه حلوه علي كلمة بحبك.

بيجمعنا اغنيه حلوه.. اغنيتين.. تلاته.. 

يوم إجتمعنا.. التحمنا.. قربنا..

و صبحنا بعده ما عدنا لبعض.

بيننا احساس يمكن متبادل و يمكن لأ..

بيننا زعيق و خناق و تجريح ..

حرقة دم و دموع و ضحك.

بيننا حاجات لو اتقالت ميفهمهاش غيري و غيرك.

و بصات معناها كلام، تبصلي ادور وشي و ابصلك تضحك.

بيننا فيلم. تافه. بس بنحبه.

بيننا سهر و حكاوي و اسرار.

بتجمعنا حاجات كانت اول حاجه ..

بيننا كتير و معودناش زي الأول.

معادش بيجمعنا غير شوية حاجات و ذكريات.

واللي بيجمعنا .. كلام كتير بنقوله.

بيجمعنا مشاوير طويله من غير وجهه بنلف ف الشوارع بلا هدف غير ان احنا مع بعض..

بتجمعنا تواريخ و ذكريات انت مش حافظها و انا حافظاها زي اسمي..

بيجمعنا ...

بيجمعنا حاجه لا انت عارفها و لا انا فاهماها ..

حاجه مش عارفين هي حلوه ولا وحشه..

صح ولا غلط..

بس مجمعانا ..

و بقينا يمكن احسن م ابتدينا ..

و خلينا الواقع .. يتفوق علي نقطة البدايه.