ممكن الدنيا تبطل تدور و الشمس متشرقش بكره؟
و امواج البحر تقف
و المطر يبطل ينزل
و يختفي القمر من السما
و كل اتنين بيحبوا بعض ينسوا
و كل واحد مره اتجرح و قلبه اتكسر يمتلك قلب جديد؟
كل الل مش فاهم يفهم
و اللي بيتفلسف يصبح اخرس
و كل اللي كاتم شئ ف قلبه يصرخ بعلو صوته؟
و كل مزعج يسكت
و كل مكروه يتحب
و اللي عمره ما حب يحب و لا ينجرحش؟
طب ممكن يوم انام و اصحى بعد ايام؟
و ممكن اغمض و افتح الاقيني رجعت زمان..؟
ف حضن امي ولا بيلاعبني ابويا
مفيش ف دماغي حاجه ولا ف قلبي هم و لا ف حياتي مسئوليه
ولا بهرب من الغم
ولا ورايا حاجات لازم تخلص
و لا جوايا حيره و شك؟
و ممكن يوم نصبح غربا بجد ملناش ذكرى نفتكرها ولا صوره تجمعنا ..
ننسي كل شئ صار ما بيننا ..
طب مينفعش مينفعش نرجع شويه بالوقت قبل ما ناخد كل قراراتنا الغلط و نلغيها و ننسى كل اللخبطه اللي سببتها ؟
طب و بعدين .. لما كل ده مستحيل و كل دي خيالات ..
انا المفروض اعيش و ف حياتي كل ده؟
طب ازاي ؟
No comments:
Post a Comment