كنت بحب اسمع صوته قبل م انام.
و كنت بحب احضنه لما اشوفه و اتفرج عالناس اللي بتبصلنا باستنكار ف الشارع.
كنت بحب اشوفه بيضحك و كنت بحب اما يمسك ايدي و صوابعنا تشبك ف بعض.
و كنت بحب غيرته و نرفزته كان بيبقى هيطقله عرق عشان عايزني اكون بتاعته و بس.
كنت بحب اما يكلمني يزعقلي اني مكلمتوش طول اليوم و كان قلقان عليا
وكنت بحب اصحى الاقيه مستنيني هه
و كنت بحب اوي انام عشان تاني يوم ييجي عشان عارفه اننا هنتقابل.
كنت بحب وجوده جمبي و خوفه عليا و اهتمامه بيا
كنت بحب اسمعه اوي اما يتكلم عشان نادرا اما بيتكلم او يحكي
كنت بحب آخد رأيه و استشيره ف قراراتي و اختياراتي حتى لو مش هعمل بيها
كنت بحب اعند معاه و لما يقفش اقوله م انت عارف انك بتحبني و مش هتعرف تقفش عليا
كنت بحب اما نبقى ماشيين و فجأه يقف و يدخل محل يجيبلي شوكولاته بحبها
و كنت بحب انه كان متقبلني زي م انا و بيحاول يخليني احسن
وكنت بحب انه بيتأقلم مع جناني مع اني مستفزه
و كنت بحب لمعة عينيه اما يتكلم عن حاجه بيحبها أو فرحته
و كنت بحب حبه ليا و انه مكنش بيزهق من ولا بيعرف يسيبني
كنت بحبه اوي.. او ما زلت.. مش فاكره اني بطلت احبه...
بس كنت و ما زلت متأكده انه اهم شخص دخل ف حياتي.
No comments:
Post a Comment