صاحبك ..

أسوأ إحساس ممكن الشخص يحس بيه انه يحس إن أقرب الناس ليه، الناس اللي المفروض أقرب له من أي حد .. 

مش فاهمينه..

بيسأل نفسه لما دول مش فاهمني، مين اللي هيفهم؟ 

عارف يعني ايه أقرب حد ليك، اللي بتحبه و بتحترمه و بتقدر كل حاجه بيعملها .. ميقدرش إحساسك و حالتك؟ 

عارف يعني ايه يفسر إحساسك و حالتك دول ب إنك بتتفاداه و مش بتحبه و قاصد تضايقة؟ 

عارف يعني ايه بدل ما يخليك تحس انك أحسن و يساعدك، يزود اللي أنت فيه و يحسسك بالذنب؟ يفضل يأنب فيك كده لحدما يحسسك بالذنب يوصلك لحالة انك لا طايق نفسك ولا طايقه ولا طايق نص كلمه من حد.. 

و تتكلم معاه يقولك "ماهو أصل أنت مش حاسس بيا؟" 

تبقي عايز تقوله"يعني أنت اللي ما شاء الله حاسس بيا أوي ؟"

يمكن أنت بتضايقه بطريقة كلامك أو ردك أو تعاملك، بس هو مش قادر يفهم اللي أنت حاسس بيه و يفضل يعمل اللي بيعمله لحد ما تبقى مضطر تضايقة أكتر و أكتر ب إنك تتجنبه عشان أنت عارف انك لو رديت عليه هتشوط فيه و هتتخانقوا. 

و برضه. "أنت اللي غلطان" .. 

يابني إرحمني. 

 مفيش خالص.. بس عشان هو مش فاهم. 

بيزيد الطين بله.

طب ايه بقي؟ و بعدين؟ هنفضل كده؟. 

تروح تتكلم تاني بس المره دي عندك حالتين، 

ياااا إما هيتأسفلك و يتفهم. 

يا إما الضربة القاضيه، هيديلك الرد اللي يهيجلك القولون العصبي ولو معندكش قولون عصبي، متخافش خالص هيجبهولك. 

هيقولك أصل أنت أصلا كئيب و بتحب الكابه و انا خلاص تعبت ومش قادر استحمل. 

هيجيلك حالة إذبهلال، و هتتعصب و بعدين هتموت علي روحك من الضحك هتحس في ساعتها انك أهبل يعني. و برضه هتتخانقو.

قفلتهالك أنا؟ لااااء اطلاااقا. 

بص يا سيدي، أنت هتبقي عارف انه متضايق و مش هتتكلمو .. بس بعد شويه حالتك ديه هتخلص و هتفوق بقي لنفسك و للناس و للدنيا .. و لازم تعمل أراجوز عشان تصالحه .. بس كده و متعملش كده تاني بقي حرام استحمله أنت شويه... ماهو ياما استحملك برضه.. و بعدين مانتو عارفين من الأول إن عشان أنتو صحاب لازم ولا بد تستحملوا بعض .. ماهو عشان كده أنتو صحاب، لأن كل واحد فيكو مستحمل التاني و هو عارف إن مفيش حد تاني هيستحمله ...